A M M A A S S I S O Q
“Ammaassisoq” kikkunnut naatsorsuussaava?
”Ammaassisoq”, STI, EFG-luunniit aqqutigalugit allaffimmiutut pisiniarfimmiutullu ilinniagaqareersimasunut naatsorsuussaavoq. Ilinniagaqaqqinneq suliffilinnut eqqarsaataavoq.
Ilinniakkap siunertaa
Ilinniarnerup suliffinnut piukkunnarsarnissat siunertaraa. Suliffinni naleqquttumik piginnaaneqalernissannut ilinniagaqaqqinnissannullu ammaassisuulluni.
Ilinniagaqarnissaq qanoq ilusilerneqarpa?
”Ammaassisoq” marlunnik sammiveqarpoq, taakkunanilu ilinnut tulluartoq ukunani toqqarsinnaavat:
- Inuussutissarsiutitigut aningaasarsiornermi aqutsineq
- Allaffissorneq suliamillu ingerlatsineq
Ilinniagaqaqqinneq immikkoortortamik ataatsimoorfimmik aallarnerfeqassaaq (modul 1), illit ilinniartoqatillu ilagalugit immikkut sammisat marluusut sukumiisumik eqqartornissaannut.
Immikkoortaq siulleq naammassigukku sammisat marluk pilerigisannik atorfissaqartitannillu qinissavatit.
Ilinniagaqaqqiffik naammassissaaq immikkoortortat 2 aamma 3 naammassigukkit.
Immikkoortortaq 1 aamma 3 naammassippata soraarummeertoqassaaq.
Ilinniagaqarnissap sivisussusissaa?
Ilinniagaqarnissaq ingerlanneqarsinnaavoq qaammatit arfineq pingasut qulingilualluunniit ingerlaneranni.
Qaammatit taakku ingerlaneranni pingasoriarluni atuarfimmi ilinniagaqarneq ingerlanneqassaaq. Atuarfimmiinnerlu sivisussuseqartassaaq sapaatit akunnerinik pingasunik.
Immikkoortortaq ataaseq akunnernik 120-nik sivisussuseqarpoq.
Immikkoortortani qarasaasiakkut suliassanik suliassinneqartassaatit. Taamaattumik pisariaqarpoq namminerisannik qarasaasiaqarnissat imaluunniit suliffinniit qarasaasiaqartitaanissat.
Sumi ilinniagaqarneq ingerlanneqarsinnaava?
Immikkoortortaq siulleq Nuummi Qaqortumilu neqeroorutigineqassaaq.
Inuussutissarsiutitigut aningaasarsiorneq:
Niuernermik Ilinniarfik, Nuummi imaluunniit Niuernermik Ilinniarfik, Qaqortumi.
Allaffissorneq suliamillu ingerlatsineq:
Taamaallaat Niuernermik Ilinniarfik, Nuummi.
Ilinniagaqarneq qanoq akeqarpa?
Immikkoortortaq ataaseq inummut ataatsimut akeqarpoq: 7.750,00 kr.
Immikkoortortaq siulleq immikkut akilerneqassaaq. Immikkoortortat aappaat pingajuallu ataatsikkut akilerneqassapput suna ingerlaqqiffiginiarnerit aaliangiutereerukku.
Ilinniagaqarnissaq AMA-mit tapiiffigineqarpoq.
|
